انا عندي مشكلة بدي احكيلكو اياها ويا ريت تساعدوني

انا عمري 20 سنة وخطيبي عمره 27 سنة انا بحبه كثير وهو كمان بس في عندي مشكلة انه مش قادر يفهم انه انا الي صاحبات وبقدر احكي معهم.

كل ما يعرف انه حكيت مع صاحباتي على التلفون او شفتهم لازم تصير مشكلة بينا هو بدو اياني اترك كل صاحباتي وما احكي بالتلفون ولا مع اي شخص غيره هو، مع العلم انه ما بحكي غير معه ومع صاحباتي وكثير بظلو يقوللي اذا بتحبيني اتركي صاحباتك وما تحكي معهم ولما اقول له موافقة بس على شرط انه انت كمان تترك صحابك بتعصبن علي وبصير يقوللي انا زلمة وانا حر بتصرفاتي.

 هو حجته انه صاحباتي بنات مش ملاح مع العلم انه عمره ما قعد معهم وصحابه شباب مش ملاح نهائيا … اخر مرة رن علي وكنت بحكي مع صاحبتي هاي صاحبتي كثير مقربة الي مثل اختي واكثر، دائما مع بعض حتى اهلي واهلها بيعرفوا بعض وبنطلع العائلتين رحلات كثير مع بعض. اول ما رن انا رديت عليه وكان متعصبن وصار يصرخ علي وقال لي سكري التلفون من دون ما تعتذري من البنت طبعا انا ما قدرت اسكر الخط بوجها تركت المكالمة معها معلقة لحتى هي سكرت لحالها وبعد ما خلص صراخه علي طلب مني احطه معها مكالمة جماعية انا ما رضيت بالاول لانه اهانة الي ولصاحبتي. بس هو اصر علي كثير رنيت عليها وقلتلها اني بدي احطها بالمكالمة معنا حكى معها وسلم عليها وبعدين هي راحت وسكرت الخط معنا وبعد ما سكرت حلف انه انا ما احكي معها بحياتي واذا انا حكيت معها هو بيفسخ الخطوبة انا مش عارفة شو بدي اعمل انا بحبه كثير ومرات كانت تصير مشاكل بينا وكنت انا السبب بس هو يسامحني بس برضه هي صاحبتي وانا بعرفها اكثر من 8 سنين وبقدرش محكيش معها لانه حتى لو فكرت ما احكي معها او اشوفها رايحة اشوفها لما نطلع العائلتين مع بعض وهو صار حالف انه رح يفسخ اذا انا حاكيت معها او شفتها.

ارجوكم انصحوني شو ممكن اعمل عشان ما اخسر حدا منهم الاثنين ؟